Kaso ng tigdas sa Quezon City mahigit triple na ang itinaas
Mahigit triple ang itinaas ng kaso ng tigdas sa Quezon City ngayong taon.
Ayon sa datos ng Quezon City Epidemiology and Surveillance Division, nakapagtala na ng 117 na kaso ng tigdas sa lumgsod mula Jan. 1 hanggang Mar. 25, 2025.
Ito ay mas mataas ng 317.86% kumpara sa parehong petsa noong 2024.
Ang pinakaapektado ng sakit ay mga batang limang taong gulang pababa.
Sa mga kasong naitala, 6 sa 10 kaso o 60% ay pawang hindi pa bakunado o hindi pa kumpleto ang bakuna laban sa tigdas.
Upang maiwasan ang sakit na ito, ipinayo ng QC LGU na sundin ang sumusunod na hakbang:
- Siguraduhing kumpleto ang bakuna laban sa tigdas (MR o MMR vaccine)
- Kumain ng masustansyang pagkain tulad ng prutas at gulay na mayaman sa vitamin A at C.
- Huwag lumapit sa may tigdas o may sintomas nito tulad ng lagnat, ubo, sipon, at pantal sa balat.
- Takpan ang bibig at ilong kapag umuubo o bumabahing upang hindi makahawa o mahawaan.
- Palaging maghugas ng kamay gamit ang sabon at tubig upang maiwasan ang pagkalat ng virus
- I-disinfect ang mga gamit gaya ng ibabaw ng mesa, doorknobs, at iba pang madalas hawakan.
- Kung may lagnat na tumatagal ng mahigit tatlong araw, mayroong pantal sa katawan, ubo, at sipon, agad na kumonsulta sa doktor.
- Huwag mag-self-medicate; sundin ang payo ng doktor para sa tamang gamutan. (DDC)
