30 Pinoy human trafficking victims sa Myanmar nakauwi na sa bansa

Matapos ang matinding pagsubok sa ibang bayan, ligtas na nakabalik sa Pilipinas ang 30 na Pilipinong biktima ng human trafficking sa Myanmar sakay ng PR733 sa Ninoy Aquino International Airport (NAIA) Terminal 1 ngayong Martes, Marso 25.

Sa pagtutulungan ng Department of Foreign Affairs (DFA), Department of Migrant Workers (DMW), Overseas Workers Welfare Administration (OWWA), Department of Health (DOH), Department of Social Welfare and Development (DSWD), Department of Justice (DOJ), at MIAA-MEDICAL, natiyak ang ligtas nilang pag-uwi at agarang tulong para sa kanilang muling pagsisimula.

Patuloy ang gobyerno sa laban nito kontra human trafficking para pangalagaan ang kapakanan ng ating mga kababayan.

Samantala pinaalalahanan ng DMW ang mga Pinoy na huwag mahulog sa mga pangako ng sindikato para mapadali ang kanilang pagpunta sa ibang bansa para magtrabaho.

Nabatid na ang mga pinagmalupitang biktima ay pinagtrabaho sa scam hub sa Myanmar kapalit ng pangakong mataas na suweldo.

Inaasahan naman ang pagdating sa bansa bukas, Marso 26 ng 176 pang Pinoy human trafficking victims. (Bhelle Gamboa)