Higit 8,000 trained cops ipinakalat ng NCRPO vs transport strike; maximum tolerance ipinapatupad

Aabot sa kabuuang 8,152 na trained cops ang ipinakalat ni National Capital Region Police Office (NCRPO) Regional Director BGen Anthony A. Aberin upang siguruhin ang kapayapaan, kaayusan at kaligtasan ng publiko sa iba’t ibang lugar sa Metro Manila para sa isinasagawang kilos-protesta ng “Manibela” Transport Group kontra Public Utility Vehicle (PUV) Modernization Program ng gobyerno.

Ayon kay BGen Aberin, kasama sa mga dineploy na pulis mula sa Civil Disturbance Management (CDM) contingents, at mga tauhan na itinalaga sa mga pangunahing kalsada, transport terminals, commercial zones, at ibang matataong lugar.

Nagbibigay garantiya naman sa sapat na puwersa kung kakailanganin ang Reactionary Standby Support Force (RSSF).

Bukod pa rito idineploy din ang police units sa mobile patrols, foot patrols, at motorcycles para tiyaking tuluy-tuloy ang presensiya at mabilis n pagtugon sa anumang maaaring mangyayaring sitwasyon.

Nakipag-ugnayan din ang NCRPO sa mga local government units (LGUs) at concerned agencies para sa posibleng probisyon o pagpapatupad ng transport assistance sa mga pasahero na maaapektuhan sa tigil-pasada.

“While we are committed to respect the right of people peacefully assemble and express their views, we want also to remind them to always follow the law and respect the right of other people. Committed to maximum tolerance, we will be there to ensure safety of all people. We will enforce the law,” sabi ni BGen Aberin.

Nanawagan ang NCRPO sa publiko na manatiling kalmado, handa sa kooperasyon, at mapanuri sa panahon ng kilos-protesta. (Bhelle Gamboa)