28-anyos na lalaking pasahero sa NAIA inaresto matapos mahulihan ng mga bala

Isang 28-anyos na lalaking pasahero ang hinarang sa NAIA Terminal 3 matapos matuklasan ang mga bala sa kaniyang bagahe.

Mahigpit na ipinatutupad ng ng PNP Aviation Security Group Republic Act 10591 o ang Comprehensive Firearms and Ammunition Regulation Act lalo ngayong umiiral ang Election Gun Ban.

Papasakay na sana ng eroplano ang pasahero nang mapansin ng X-ray operator ang kahina-hinalang bagay sa kaniyang bagahe nang idaan ito sa Final Security Screening Checkpoint.

Sa ginawang manual inspection, nakumpirma na may dalang apat na piraso ng 9mm caliber ammunition ang lalaki at walang legal na dokumento ang mga ito.

Dahil dito, inaresto ang pasahero dahil sa paglabag sa RA 10591 at Gun Ban.

Ayon sa pasahero, hindi niya alam na nasa bag niya pa ang mga bala na ginamit niya sa firing activity noon pang nakaraang taon.

Nasa NAIA Terminal 3 Police Station ang pasahero na mahaharap sa karampatang reklamo. (DDC)