Pagdaraos ng End-of-School-Year Rites itinakda ng DepEd sa Apr. 14 at 15
Sa April 14 at 15 idaraos ang mga End-of-School-Year (EOSY) Rites para sa mga pampublikong paaralan sa bansa.
Sa anunsyo ng DepEd, ang mga aktibidad para sa pagtatapos ng mga mag-aaral ay mayroong tema na “Henerasyon ng Pagkakaisa: Kaagapay sa Bagong Pilipinas.
Sesentro ang mga pagdiriwang sa kahalagahan ng pagkakaisa at kolektibong hakbang upang makamit ang mas malakas at mas maliwanag na kinabukasan.
Sa DepEd Memorandum Circular No. 27, inatasan ang mga paaralan na magdaos ng simple subalit makahulugan ang mga graduation at moving-up ceremonies.
Dapat ding iwasan ang sobra-sobrang gastusin, pagpapasuot ng magagarbong damit o pagdaraos ng seremonya sa masyadong magaganda at mamahaling venues.
Ang mga non-academic projects gaya ng field trips, film showings, Junior-Senior Promenade at iba pang kahalintulad ay hindi dapat gawing requirements para sa graduation. (DDC)
