LTO ipinatawag ang may-ari ng motorisklo na nag-viral sa social media makaraang pumarada sa gitna ng kalsada sa Antipolo City

Ipinatawag ng Land Transportation Office (LTO) ang may-ari ng motorsiklo na nag-viral sa social media makaraang pumarada sa kalagitnaan ng kalsada sa Antipolo City.

Sinabi ni LTO Chief, Assistant Secretary Atty. Vigor D. Mendoza, bagaman kitang-kita na mali ang ginawa ng motorista, may karapatan pa rin ito sa due process kaya diringgin ng ahensya ang kaniyang panig.

“But what I can assure the angry netizens is that if we are not convinced by the reason cited by whoever parked that motorcycle in the middle road, napakalaki ng magiging problema niya sa LTO,” ani Mendoza.

Ani Mendoza, nagpalabas na ang LTO ng Show Cause Order (SCO) laban sa rehistradong may-ari ng motorisklo base sa impormasyong nakuha mula sa nag-viral na video.

Tutukuyin din sa imbestigasyon kung mismong ang may-ari nito ang nagparada ng sasakyan nang makuhanan ng video.

Sa SCO na nilagdaan ni LTO-Intelligence and Investigation Division (IID) chief Renante Melitante, ang may-ari ng motorsiklo na nakatira sa Barangay San Roque sa Antipolo City ay inatasang humarap sa LTO Central Office sa Quezon City sa March 24. (DDC)