P1.890M na halaga ng high-grade marijuana galing US, nakumpiska sa Clark
Kinumpiska ng pinagsanib na pwersa ng Bureau of Customs (BOC) at ng Philippine Drug Enforcement Agency (PDEA) ang isang kargamento na galing ng Sacramento, USA matapos matuklasang naglalaman ito ng high-grade marijuana o kush.
Ang parcel na galing Sacramento, USA at patungo sana ng Surigao del Norte ay isinailalim sa X-ray scanning at nang makita ang kahina-hinalang laman nito ay nagsagawa na ng physical examination ang mga tauhan ng Customs.
Nakita sa kargamento ang kulay brown na rectangular box na may nakasulat na “Ink Toners.”
Sa loob ng box ay may nakitang itim na PVC cylinder na naglalaman ng 12 plastic sachets na mayroong green, solid substance.
Sa isinagawang chemical analysis ng PDEA, natuklasang high-grade marijuana ang laman ng mga plastic na aabot sa 2.09 kilograms at nagkakahalaga ng P1,890,000.
Nagpalabas na ng Warrant of Seizure and Detention sa kargamento dahil sa paglabag sa R.A. No. 10863 o Customs Modernization and Tariff Act (CMTA) in relation to R.A. No. 9165. (DDC)
