DepEd hiningi ang tulong ng NBI sa anomalya sa SHS Voucher Program
Hiningi ng Department of Education (DepEd) ang tulong ng National Bureau of Investigation (NBI) para maimbestigahan ang umano ay pag-abuso ng ilang pribadong paaralan sa Senior High School (SHS) Voucher Program.
Ito ay matapos mabunyag ang pagkakaroon ng “ghost students” o “ghost beneficiaries” sa ilalim ng nasabing programa.
Inatasan din ni DepEd Sec. Sonny Angara ang Executive Committee ng ahensya para isulong ang legal at administrative actions laban sa mga mapapatunayang sangkot sa iregularidad.
Sa ngayon ay pinalalakas na aniya ang mekanismo sa SHS Voucher Program para matiyak na hindi ito naaabuso.
Ayon kay Angara, kabilang sa ipatutupad ang multi-layered verification na sisimulan sa cross-checking data sa pagitan ng Voucher Management System (VMS) at Learner Information System (LIS) para matiyak na ang benepisyaryong estudyante ay totoong naka-enroll sa paaralan.
Ang ikalawang level ng validation ay isasagawa ng DepEd Central Office (CO) kung saan susuriin ang billing statements at LIS records.
Magkakaroon din ng post-billing monitoring process na isasagawa naman ng Private Education Assistance Committee (PEAC) at ang final layer ng verification ay ang post-validation review na isasagawa ng DepEd.
Inatasan din ng DepEd ang mga Regional at Schools Division Offices (ROs/SDOs) nito na magsagawa ng school inspections at magsumite ng detalyadong report sa Central Office. (DDC)
