Publiko binalaan sa pagbili ng Roblox-Inspired na laruan; natuklasang nagtataglay ng nakalalasong kemikal

Nagbabala ang Toxics watchdog na BAN Toxics sa mga magulang sa pagbili ng Roblox-inspired na laruan dahil natuklasan na nagtataglay ang mga ito ng nakalalasong kemikal.

Sa isinagawang market monitoring kamakailan ng BAN Toxics, sinuri ang mga nabiling mini-action figure toy mula sa ambulant vendor sa Quezon City at lumabas na may taglay itong nakalalasong lead na aabot sa 1,460 parts per million (ppm).

Maliban sa lead, ang laruan ay nagtataglay din ng antimony, arsenic, bromine, chromium, at mercury.

Hindi rin nakasunod ang nasabingprodukto sa umiiral na product labeling standards na itinakda ng RA 10620 o ang Toy and Game Safety Labeling Act of 2013.

Ayon kay Thony Dizon, Toxics Campaigner ng BAN Toxics, dapat mag doble-ingat ang mga magulang sa binibiling laruan para sa kanilang mga anak.

Ayon sa World Health Organization (WHO) ang lead ay maaaring makaapekto sa brain development ng mga bata at maaaring makapagbaba sa kanilang intelligence quotient (IQ).

Ipinagbawal na din ang paggamit ng lead sa paggawa ng mga laruan at school supplies batay sa DENR Chemical Control Order for Lead and Lead Compounds. (DDC)