P272M na halaga ng shabu nakumpiska ng PDEA sa isang suspek sa Rizal

Aabot sa P272 million na halaga ng shabu ang nakumpiska ng mga tauhan ng Philippine Drug Enforcement Agency (PDEA) sa ikinasang buy-bust operation sa Binangonan, Rizal.

Ayon kay PDEA Director General Undersecretary Isagani R. Nerez tinatayang aabot sa 40 kilograms ang mga nakumpiskang shabu sa operasyon.

Ikinasa ng mga tauhan ng PDEA Intelligence Service; PDEA Regional Office-National Capital Region (RO-NCR) Regional Special Enforcement Team 2; PDEA Regional Office IV-A, Rizal Provincial Office; at Philippine National Police Drug Enforcement Unit (PNP-PDEU) Rizal, ang buy-bust operation sa Rizal Cement Village, Barangay Pantok, sa Binangonan.

Nagresulta din ito sa pagkakadakip sa isang drug personality na kinilala sa alyas na “Ronald”.

Mahaharap ang suspek sa kasong paglabag sa Section 5 at Section 1, Article II ng Republic Act 9165 o Comprehensive Dangerous Drugs Act of 2002. (DDC)