328 correction officers ng BuCor nakatapos sa kanilang Corrections Officer Custodial Basic Course
Nasa 328 na Corrections Officers ang matagumpay na nakakumpleto ng kanilang Corrections Officer Custodial Basic Course (COCBC) sa idinaos na seremonya ng Araw ng Pagtatapos sa Corrections National Training Institute (CNTI) Parade Ground sa loob ng New Bilibid Prison (NBP) compound sa Muntinlupa City.
Pinangasiwaan ni Bureau of Corrections Director General Gregorio Pio P. Catapang Jr. ang panunumpa sa tungkulin ng mga bagong graduates mula sa Class 2024-02 DASIG Tikas, na tumitindig para sa temang “Disiplinadong Aksyon na may Sinseridad at Integridad Gabay sa Tungkulin ng Institusyong Koreksyon at Alay sa Sambayanan – para sa Bagong Pilipinas.”
Ayon sa datos ng CNTI mayroon na itong kabuuang 1,008 na graduates ng COCB sa unang bahagdan ng taon 2025 sa pamamagitan ng decentralization program kung kaya tumataas ang puwersa ng correction officers ng BuCor.
Inihayag din ni Catapang na ito na ang pinakamalaking bilang ng basic recruit course graduates sa kasaysayan ng BuCor.
Binanggit din nito na ang COCBC Class 2024-02 DASIG-TIKAS ay isa sa ilang classes na binuo bilang parte ng decentralized training program sa iba’t ibang Operating Prisons and Penal Farms (OPPF).
Bukod sa mga bagong graduates mula sa NBP na binubuo ng 315 Corrections Officers at 13 Corrections Technical Officer 1, nagsipagtapos din noong Pebrero 7 ang 188 na correction officers sa Iwahig Prison and Penal Farm na sinundan ng graduation rites naman ng 77 COCBC trainees sa Sablayan Prison and Penal Farm, 128 graduates sa Leyte Regional Prison ar 92 na iba pa sa San Ramon Prison and Penal Farm nitong Marso 7.
Sa Marso 24 itinakda ang Araw ng Pagtatapos ng 195 COCBC trainees sa Davao Prison and Penal Farm.
Nabatid na ang COCBC Class 2024-02 “DASIG-TIKAS” ay sumaillim sa anim na buwang in-house training kasama na ang military professionalism, rigid physical conditioning, firearm proficiency, self-defense tactics, academic lectures, at on-the-job experiences.
“In contrast to the previous batch where major events of the course had to be done simultaneously in all OPPFs, this time the Local CNTI Units, headed by their corresponding Course Supervisors, were given freedom to go about their own pace, which resulted in varying lengths of training periods and dates of graduation ceremonies,” sabi ni CNTI CSupt. Lucio Guevarra. (Bhelle Gamboa)
