Tao sa tao humaharap sa inyo: Melai at TRABAHO nakipagkapwa-tao sa palengke
“Tao sa tao humaharap sa inyo- sincere! Para sabihin ang ating mga plataporma dito sa TRABAHO Partylist,” iyan ang mga katagang binitiwan ni Melai Cantiveros-Francisco sa kaniyang pagbisita sa Mutya ng Pasig Mega Market nitong Biyernes.
Sa kaniyang pagbisita, masaya at buong pusong nakipagkapwa-tao si Melai sa mga taga-Pasigueños kasama ang kapwa babaeng nominees ng TRABAHO upang maibahagi ang plataporma ng grupo.
“Ako mismo na si Melai [ay] talaga naman sumusuporta at naniniwala sa ating TRABAHO Partylist, 106 [sa balota],” paghahayag ng aktres.
Maliban sa pakikipag-selfie, pakikipagyakap, at pakikipag-kumustahan ay walang pag-aatubiling nagpaunlak ang grupo sa alok ng mga tindera na makisalo sa kanilang pananghalian.
Sa pagdidiin ng importansya ng face-to-face na kampanya, paulit-ulit na sinasambit ni Melai sa kanilang mga nakasalamuhang nagtitinda, manggagawa, at mamimili ang kahalagahan ng “tao sa tao” na nakikita nila kung sino ang mga tumatakbo sa likod ng mga partylist.
“Kasama po natin dito si Ms. Ninai [Chavez] saka si Atty. Johanne Bautista- sila po ang magsusulong sa ating mga karapatan para sa ating mga trabaho,” pagpapakilala ni Melai.
“Kami po sa 106 TRABAHO Partylist naniniwala na ang bawat mangaggawa- kasama na po ang mga manininda–ay dapat may disenteng trabaho, maayos na kita, magandang kalidad ng buhay. Kaya isusulong po namin ang proteksyon para sa inyong mga pangkabuhayan, tulong pinansyal at pangkabuhayan, pagbibigay ng tulong para sa inyong kalusugan at kaligtasan, at patas na oportunidad po para sa lahat ng miyembro ng ating lipunan,” pagpapaliwanag ng first nominee ukol sa paniniwala ng TRABAHO.
Si second nominee Chavez naman ay pinuri ang mga sakripiso ng mga nagtitinda sa palengke lalo na sa panahon ng pandemya.
“Alam po din natin no’ng sa pandemya, narinig naman po natin nabigyan po ng benepisyo ang mga nurse, ang mga military officers during pandemic pero hindi po natin narinig na nabigyan po ng benepisyo ang ating mga unspoken heroes–ang ating mga manininda,” pagsaludo ng second nominee.
Personal na naibahagi rin ni Melai na siya ay at-home talagang makipagkapwa-tao sa palengke.
“So, ‘pag andito ako sa palengke parang at-home talaga ako kasi iba ‘yong mga buhay natin lalo na mga nanay diyan, ‘di ba? Shoutout sa mga nanay diyan!,” sabi ni Melai na isa ring working mom.
