Illegal recruiter arestado matapos makauwi galing sa scam hub sa Myanmar

Inaresto ng National Bureau of Investigation – International Airport Investigation Division (NBI-IAID) ang isang babaeng recruiter na kabilang sa mga Pilipinong nasagip mula sa isang scam hub sa Myanmar.

Dumating sa Pilipinas ang 12 na Pilipinong biktima ng human trafficking matapos silang mailigtas ng mga sundalo mula sa Democratic Karen Benevolent Army (DKBA).

Ayon sa kanilang testimonya, sapilitan silang pinagtrabaho nang hanggang 16 oras kada araw sa isang scam hub, walang sahod, at kulang sa pahinga.

Bukod dito, nakaranas sila ng pang-aabuso mula sa mga dayuhang nagpapatakbo ng operasyon, lalo na kapag hindi nila naabot ang itinakdang quota.

Isa sa mga nasagip ay kinilalang si Jessa Marie Casidsid na kalaunan ay natuklasang siya mismo ang nag-recruit sa pito sa kanyang mga kasamahan.

Dalawa sa mga ito ay dati niyang katrabaho sa Pilipinas bago niya inalok ng trabaho sa Thailand, habang ang lima naman ay nakilala niya sa isang scam hub sa Laos bago siya lumipat sa Myanmar.

Ayon sa mga biktima, inalok sila ni Casidsid ng posisyong customer service representative sa Thailand na may buwanang sahod na $1,500.

Ngunit sa halip na sa Thailand ay dinala sila sa Myanmar, kung saan sila napilitang magtrabaho sa isang scam hub.

Noong Pebrero 20, 2025, agad siyang inaresto ng NBI-IAID at kasalukuyang nasa kustodiya ng ahensya.

Mahaharap siya sa mga kasong paglabag sa Republic Act 8042 o Migrant Workers and Overseas Filipinos Act of 1995 at Republic Act 9208 o Anti-Trafficking in Persons Act of 2003.

Samantala, labindalawa sa mga biktima ang nabigyan na ng legal assistance, psychosocial support, at pinansyal na tulong mula sa DMW.

Nagpaalala ang DMW sa publiko na maging mapanuri sa mga alok ng trabaho sa ibang bansa at iwasan ang iligal na recruiters upang hindi mabiktima ng human trafficking. (DDC)