Mga opisyal sa DOTr pinagsumite ng courtesy resignation ni Sec. Vince Dizon
Kinumpirma ni Department of Transportation (DOTr) Sec. Vince Dizon na inatasan niyang magsumite ng resignation ang mga undersecretary at assistant secretary ng DOTr.
Sa press conference, sinabi ni Dizon, “standard” sa isang ahensya ang pagsusumite ng courtesy resignation ng mga opisyal kapag mayroong bagong liderado.
Ito ay para mabigyang pagkakataon ang bagong kalihim na makapagtalaga ng mga opisyal na sa tingin niya ay nararapat sa pwesto.
Hindi pa naman aniya tiyak na tatanggapin niya ang resignation ng mga opisyal.
Nilinaw din ni Dizon na ang direktiba ay para lamang sa mga usec, asec at director sa DOTr head office at hindi sakop ang mga attached agencies ng DOTr at GOCCs. (DDC)
