ACT-CIS Rep. Erwin Tulfo pinagtibay ang suporta sa Las Piñas
Mainit na tinanggap si ACT-CIS Partylist Representative Erwin Tulfo nina Mayor Imelda Aguilar at Vice Mayor April Aguilar, matapos itong bumisita sa lungsod ng Las Piñas City, nitong Pebrero 18 ngayong taon.
Sa isang pahayag sinabi ni Rep. Tulfo na ito ay sumasalamin sa matagal at magandang relasyon sa pagitan niya at ng pamilya Aguilar gayundin ang patuloy na pangakong suporta sa mamamayan ng Las Piñas.
“Simula pa noong panahon ng namayapang ang aming ama na si dating Mayor Nene Aguilar, kung saan ikinonsidera nitong mapagkakatiwalaang kapanalig si Tulfo noong reporter pa ito ng Manila Times”, pagbabalik-tanaw ni Vice Mayor April Aguilar.
Sinabi rin ni Vice Mayor Aguilar na binigyang-importansiya niya ang malalim na nag-uugnay sa pagitan ni Cong. Tulfo at ng pamilya Aguilar.
Buong-pusong pinasalamatan ng bise-alkalde si Tulfo dahil sa hindi matawaran suporta nito sa lungsod ng maraming taon lalo na noong kasagsagan ng COVID-19 pandemic kung saan nagbigay ng lubos na tulong ang mambabatas sa Las Piñas.
Binigyang-diin pa nito na kung paano trinato si Tulfo bilang parte ng kanilang pamilya dahil sa patuloy niyang suporta sa kanilang adhikain ni Mayor Mel Aguilar sa pagseserbisyo publiko.
Inalala naman ni Rep. Tulfo ang pagkakaibigan nila ni dating Mayor Nene Aguilar na nagsimula pa noong 1990s at ang kanyang pamalagiang paggalang para sa pamilya Aguilar.
“Maganda ang legasiya ng serbisyong naiwan ni Mayor Nene na naghatid ng positibong epekto sa Las Piñas at ang patuloy na tiwala ng komunidad sa liderato ng Aguilar’, pagpuri ng kongresista.
“Tunay sa kanyang adbokasiya na “Kakampi ng inaapi,” pahayag ni Tulfo sa muling pangakong matibay na suporta sa pamilya Aguilar at sa mamamayan ng Las Pinas.
Isang motorcade naman sa Las Pinas ang isinagawa ng kongresista kasama si Alelee Aguilar, na nagsilbing oportunidad para sa mga namumuno na kumonekta sa mga residente at pagtuon ng pansin sa mga pinagsisikapang serbisyo publiko.
“Naninindigan ang Pamahalaang Lungsod ng Las Piñas sa pagsusulong ng partnerships o pakikipagsosyo na magpapalakas ng serbisyo publiko at siguruhin ang patuloy na pag-unlad ng komunidad”, Las Piñas City Mayor Imelda Aguilar. (Noel Talacay)
