Ninakaw na Toyota Fortuner na-recover sa Davao Oriental

Nabawi ng mga tauhan ng Philippine National Police-Highway Patrol Group (PNP-HPG) ang isang ninakaw na Toyota Fortuner sa Davao Oriental.

Ikinasa ang operasyon ng Regional Highway Patrol Unit 11 (RHPU 11), sa Barangay Mayo, Mati City.

Ayon sa may-ari ng sasakyan, ipinahiram niya ang Fortuner at base sa kasunduan, ang humiram nito ang magpapatuloy ng buwanang hulog habang siya ang gumagamit nito.

Gayunman, nakatanggap ng tawag ang may-ari ng Fortuner mula sa financing agency at sinabing hindi nababayaran ang buwanang hulog sa sasakyan.

Sa kabila ng apela ng may-ari na ibalik na sa kaniya ang Fortuner ay hindi ito isinauli ng suspek.

Doon na nagkasa ng operasyon ng otoridad na nagresulta sa pagkakabawi ng sasakyan.

Patuloy namang pinaghahanap ang suspek. (DDC)