Doktor sa Bicol Medical Center natagpuang patay at may tama ng bala ng baril sa ulo

Natagpuang walang buhay at may tama ng bala ng baril ang isang 36-anyos na doktor sa Naga City, Camarines Sur.

Ayon sa Naga City Police Station, si Dr. Rajean Monette Romualdez ay may tama ng bala sa kaniyang ulo ng matagpuan sa loob ng isang sasakyan sa bahagi ng Barangay Concepcion Pequeña.

Si Romualdez ay doktor sa Bicol Medical Center.

Agad namang iniutos ni Naga City Mayor Son Legacion ang agarang imbestigasyon sa nangyari.

Nagpaabot din si Legacion ng pakikiramay sa naulilang pamilya ni Romualdez.

Para sa mabilis na ikareresolba ng krimen, nag-alok ang Naga City Government ng P200,000 pabuya sa sinumang makapagbibigay ng impormasyon para matukoy at maaresto ang responsable sa pagpatay sa doktor. (DDC)