Mga Pinoy sa Hong Kong binalaan laban sa Money Laundering syndicates
Binalaan ng Philippine Consulate General ang mga Pinoy sa Hong Kong laban sa Money Laundering syndicates na nambibiktima ng mga dayuhang manggagawa.
Ayon sa ulat na natanggap ng konsulada, marami nang Foreign Domestic Workers (FDWs) ang nabiktima ng Money Laundering syndicates.
Hinihingan ang mga biktima ng HK$500 kapalit ang pag-sign up sa mobile online game.
Hinihingi din ng sindikato ang Hong Kong ID ng mga biktima para sa kanilang picture upang mai-activate ang online game.
Pero ang ID at picture na kinukuha ng mga sindikato ay ginagamit para makapagbukas ng virtual bank account sa ilalim ng pangalan ng biktima.
Ginagamit ang nasabing accounts para sa ilegal na aktibidad ng mga suspek at para sa Money Laundering purposes.
Paalala ng konsulada sa mga Pinoy sa Hong Kong, huwag na huwag ibibigay sa iba ang kopya ng kanilang Hong Kong IDs, passports, ATMs, at iba pang personal na dokumento. (DDC)
