Higit 900 na residente nabenepisyuhan ng Beauty Beyond Borders medical mission sa Las Piñas City
Mahigit 900 na residente ang nabenepisyuhan ng libreng healthcare services ng “Beauty Beyond Borders” medical mission na pinangasiwaan ng The Aivee Clinic, sa Aguilar Sports Complex, Barangay Pilar sa Las Piñas City.
Ang inisyatibang itonay naghandog ng free dermatological consultations, minor surgeries, at treatments para sa mga kaugnay na kondisyon sa balat.
Pinangunahan nina Mayor Imelda Aguilar at Vice Mayor April Aguilar kasama sina Alelee Aguilar, Dr. Aivee Aguilar-Teo, at Dr. Z Teo ang nasabing programa na dinaluhan ng mga konsehal ng lungsod na sina Mark Anthony Santos at Henry Medina, upang siguruhin ang maayos na pagbibigay ng dekalidad na serbisyong pangkalusugan sa mga benepisyaryo.
Nagbigay ng karagdagang saya sa mga Las Pin̈eros ang presensiya ng celebrity guest na si Daniel Padilla na personal na kinumusta ang mga lumahok at inihayag ang suporta nito sa programa.
Ang matagal ng kolaborasyon ng Pamahalaang Lungsod ng Las Pin̈as at ng The Aivee Clinic ay nagbigay-diin sa importansiya ng madaling pagkuha ng alagang pangkalusugan para sa komunidad.
Nagpaabot naman ng pasasalamat ang mga residente sa libre at dekalidad na mga serbisyong kanilang natanggap sa kasagsagan ng kaganapan.
Ang matagumpay na medical mission ay patunay ng malakas na partnership o pagtutulungan sa pagitan ng lokal na pamahalaan, pribadong sektor, at komunidad upang tugunan ang pangangailangan sa alagang pangkalusugan. (Bhelle Gamboa)
