P2.64B na halaga ng ilegal na droga nakumpiska ng BOC sa isang kargamento sa Port of Manila

Nadiskubre ng mga tauhan ng Bureau of Customs (BOC) ang isang kargamento s Port of Manila na naglalaman ng ilegal na droga.

Ayon sa BOC, nagsagawa ng examination sa shipment na idineklarang naglalaman ng food items at sa isinagawang inspeksyon, natuklasan ang tinatayang P2.64 billion na halaga ng Methamphetamine Hydrochloride o “shabu”.

Ang kargamento ay galing Pakistan at ipinadala ng kumpanyang Ayan Enterprise/Trading & Logisitics at naka-consigne sa Redshinting Consumer Goods Trading.

Una nang humiling ng alert order ang Customs Intelligence and Investigation Service (CIIS) para sa nasabing shipment matapos makatanggap ng derogatory information mula sa National Bureau of Investigation (NBI).

Ayon kay BOC Commissioner Bien Rubio, maituturing itong kauna-unahang major drug haul ngayong taon.

Samantala, limang katao na pinaniniwalaang may kuneksyon sa pagpuslit ng nasabing mga ilegal na droga ang isinailalim na sa inquest proceedings dahil sa paglabag sa Section 4 ng RA 9165, o Comprehensive Dangerous Drugs Act of 2002.

Kabilang sa mga isinailalim sa inquest ay si Oscar Campo Berba ng Redshinting Consumer Goods Trading, Customs brokers na sina Kevin Lee Manuel Arrio at Richard Perlado Aguantar, at sina Karen Villaflor Sacro at Rey Baysa Gujilde, chairman and president ng Ark Global Movers.

Ang mga consignees, senders, at recipients ng kargamento ay mahaharap din sa kasong paglabag sa Customs Modernization and Tariff Act (CMTA) at Republic Act No. 9165. (DDC/Bhelle Gamboa)