Distribusyon ng fuel subsidy sa mga trike drivers tututukan ng TODA coalition at ni Abalos

Tututukan ng Tricycle Operators and Drivers Association (TODA) coalition at ni dating Department of the Interior and Local Government (DILG) Secretary Benhur Abalos Jr. ang distribusyon ng fuel subsidy para sa mga tricycle drivers sa bansa.

Ito ang tiniyak ni TODA coalition-National Capital Region president Ace Sevilla sa mga kasapi ng mga grupong TODA-Pasay sa isinagawang pagtitipon sa Cuneta Astrodome sa nasabing lungsod dakong alas-4:00 ng hapon ng Miyerkules, Pebrero 5.

Unang hinirit ng coalition sa Land Transportation Franchising and Regulatory Board (LTFRB) na idaan sa mga local government units (LGUs) ang fuel subsidy para sa maayos at mabilis na pamamahagi ng tulong sa mga miyembro ng TODA.

Ayon kay Sevilla mahalagang matanggap ng mga tricycle driver ang P1,000 fuel subsidy na malaking tulong sa kanilang pamamasada o hanapbuhay.

Inihayag naman sa panayam kay dating kalihim na si Abalos na nananatili siyang abogado ng mga samahan ng tricycle driver sa bansa simula pa noong 2002 sa panahong alkalde pa ito ng Mandaluyong City.

Kinumpirma rin ni Abalos ang malapit na pakikipag-ugnayan sa LGUs upang mas mabilis ang pamamahagi ng tulong na subsidiya sa mga TODA members lalo na sa Metro Manila.

Ipinaliwanag pa ng dating kalihim na hindi lahat ng tricycle driver ay mayroong smart phone kaya nagka-problema ang Landbank sa pamamahagi ng fuel subsidy sa mga benepisyaryo nito.

Kaya isinusulong din ni Abalos na mapagbigyan ang kanilang hiling na maaaring tumanggap ng fuel subsidy ang kumakatawang asawa o anak ng tricycle driver.

Giit pa ni Abalos kung sa LGU manggagaling ang fuel subsidy ay madali na itong mapakinabangan ng benepisyaryo sa halip na idaan sa bangko at ipapadala sa pamamagitan ng GCash dahil walang smartphone ang ibang driver.

Kaugnay nito patuloy din na babantayan ni Abalos ang mga usapin sa problema sa proseso ng prangkisa at mataas na presyo ng petrolyo para isaalang-alang ang kapakanan ng tricycle operators at drivers na layuning tulungan silang madagdagan ang kanilang kita para sa kani-kanilang mga pamilya. (Bhelle Gamboa)