EDSA Busway pinag-aaralang alisin – MMDA

Pinag-aaralan na ng Metropolitan Manila Development Authority (MMDA) ang pagtatanggal sa EDSA busway.

Sa pulong balitaan sa Malakanyang, sinabi ni MMDA Chairman Romando Artes na repetitive ang biyahe ng mga bus sa EDSA dahil mayroon namang biyahe ang MRT-3.

Layunin din aniya na mabawasan ang mga bumibiyaheng sasakyan sa EDSA.

Ayon kay Artes, lumutang ang pag-phase out sa EDSA Busway dahil na rin plano ng Department of Transportation (DOTr) na magdagdag ng isang bagon sa mga train ng MRT-3 na mayroong 30% capacity sa bawat trip.

Tatanggalin lamang aniya ang biyahe ng mga bus kung kakayanin na ng MRT na isakay ang lahat ng pasahero.

Sinabi pa ni Artes na hindi rin naman komportable ang bus dahil hindi lahat ng istasyon ng MRT ay mayroong bus station.

Ayon kay Artes, sa sandaling maging libre ang bus lane, igagaya ito sa Amerika at ipagagamit ang linya sa “high occupancy vehicles” o mga pribadong sasakyan na mayroong tatlo o higit pa na pasahero. (CY)