Mahigit P87M na halaga ng tulong naipamahagi na ng DSWD sa mga pamilyang apektado ng pagputok ng Mt. Kanlaon

Umabot na sa mahigit P87,625,000 na halaga ng humanitarian assistance ang naipamahagi ng pamahalaan sa mga pamilyang apektado ng patuloy n apag-aalburuto ng Bulkang Kanlaon.

Ayon sa datos ng Department of Social Welfare and Development (DSWD), mayroong 12,286 na pamilya mula sa 27 barangay sa Regions VI at VII ang apektado.

Sa nasabing bilang, halos 3,000 pamilya pa o mahigit 9,000 na katao ang nananatili sa mga evacuation center.

Mayroon namang mahigit 2,600 na pamilya o mahigit 8,000 katao ang pansamantalang nakikituloy sa kanilang kaanak o kaibigan.

Ang DSWD ay mayroon pang mahigit P47.3 million na halaga ng standby funds at mahigit P2.645 billion na halaga ng food and non-food items na handang ipangtulong sa mga pamilyang patulyo na maapektuhan ng pagputok ng bulkan. (DDC)