Rehistro ng 10,000 residente sa Makati kinuwestyon sa korte

REHISTRO NG 10,000 NA RESIDENTE SA MAKATI KINUWESTYON SA KORTE

Naghain ng petisyon ang United Nationalist Alliance (UNA) sa Makati City Metropolitan Trial Court, na naka-angkla sa Section 35 ng Republic Act 8189 (The Voter’s Registration Act of 1996), na naglalayong madiskuwalipika ang mahigit 10,000 na umano’y mapanlinlang na rehistro ng mga hindi lehitimong residente ng lungsod at hindi wastong nakalista noong nakaraang taon sa voter’s registration.

Ang hakbang na ito ng UNA ay hindi lamang isang legal na aksyon kundi isang laban upang protektahan ang kapayapaan ng darating na halalan sa Makati.

Ayon sa partido, hindi hahayaan ng mga tunay na residente ng Makati na magdikta sa kinabukasan ng lungsod ang panlilinlang at pandaraya.

Nadiskubre umano ng UNA ang mga nakakaalarmang iregularidad sa listahan ng mga botante ng Makati sa 1st at 2nd legislative districts, kabilang ang mga solong address na nagho-host ng daan-daang mga nagparehistro, mga bakanteng lote at barong-barong na nakalista bilang mga tirahan, at maging ang mga pribadong ari-arian na mapanlinlang na inaangkin ng mga estranghero.

Batay sa impormasyon mula sa mga residente ng Makati at na-validate ng sariling imbestigasyon ng grupo, mayroong mahigit 50,000 flying voters na nakalusot sa listahan ng mga botante ng lungsod.

Lumalabas umanong kasabwat ang ilang opisyal ng barangay sa pamamagitan ng pagbibigay ng Barangay Certificates of Residency para sa mga hindi residente ng Makati nang hindi tinitiyak kung sila nga ay naninirahan sa kani-kanilang mga ibinigay na address o tirahan.

Layunin ng petisyon ng UNA na panagutin ang 10,558 na mapanlinlang na mga rehistro upang mapangalagaan ang integridad ng halalan sa Makati.

Noong Oktubre 2024, tinutulan ng UNA ang paglipat ng mga nakalistang rehistrong ito, na nagresulta sa mahigit 3,000 “flying registrants” ang tinanggihan ng pagpaparehistro ng Komisyon.

Hinihikayat ng partido ang Comelec na gumawa ng agarang aksyon na imbestigahan at tanggalin itong mga mapanlinlang na botante. (Bhelle Gamboa)