2 lalaki arestado sa baril at patalim sa checkpoint sa Las Piñas City
Kalaboso ang dalawang lalaki makaraang mahulihan ng baril at patalim sa isinagawang Comelec checkpoint operation ng Las Piñas City Police sa Barangay Talon Singko.
Nasa kustodiya ng pulisya ang mga suspek na sina alyas Gregy,34-anyos, at alyas Sab,21-anyos.
Ayon sa report, sinita ng otoridad si alyas Gregy dahil walang suot na helmet habang sakay ng motorsiklo at nakumpiska ang kutsilyo na paglabag sa B. P. Bilang 6 habang nahulihan naman ng baril na 9mm Beretta pistol si alyas Sab, na lumabag naman sa R.A. 10591 (Comprehensive Firearms and Ammunition Regulation Act).
Lumilitaw sa imbestigasyon na ang dalawang suspek ay nagtangka pa umanong tumakas subalit kaagad silang nasakote ng mga tauhan ng Talon Sub-Station kung saan narekober ang mga ebidensiya armas.
Dinala sina Gregy at Sab sa Station Investigation and Detective Management Section (SIDMS) para sa dokumentasyon at pagsasampa ng kaso laban sa dalawang suspek.
Ang tagumpay ng operasyong ito ng Las Piñas City Police ay sumasalamin sa pangakong tiyakin ang kaligtasan ng publiko at ipatupad ang batas lalo na ngayong panahon ng halalan.
Hinihikayat ng Southern Police District ang mamamayan na manatiling mapanuri at makipagtulungan sa pagpapanatili ng kapayapaan at kaayusan sa kani-kanilang komunidad. (Bhelle Gamboa)
