P170M na halaga ng shabu, nakumpiska sa 2 suspek sa Cebu City

Nakumpiska ng mga otoridad ang 25 kilo ng shabu sa Pier 4 sa Tinago, Cebu City.

Magkakatuwang sa ikinasang operasyon ang mga tauhan ng Department of Justice (DOJ), Philippine National Police Maritime Group (PNP MG), Naval Intelligence and Security Group (NISG), Cebu Ports Authority (CPA), Bureau of Customs (BOC), Philippine Coast Guard (PCG) at Philippine Drug Enforcement Agency (PDEA).

Nadakip sa operasyon ang dalawang high-value target na kinabibilangan ng isang 41-anyos na lalaki na residente ng Isabel, Leyte at 63-anyos na babae na residente ng Ermita, Cebu City.

Agad nagsagawa ng inspeksyon ang mga otoridad nang dumating sa pantalan ang barko na sinasakyan ng mga suspek at doon nadiskubre ang dala nilang ilegal na droga na nagkakahalaga ng mahigit P170 million.

Dinala na sa PDEA ang mga nakumpiskang shabu habang nasa kostodiya na ng PNP ang dalawang suspek.

Sasailalim sila sa inquest proceedings para sa kasong paglabag sa Republic Act (RA) No. 9165 o Comprehensive Dangerous Drugs Act of 2002. (DDC)