600 pang residente ng Barangay Talon Dos, nahatiran ng free healthcare services ng Las Piñas LGU
Nagpapatuloy sa pagsasagawa ng health and wellness caravan ang Las Piñas City Government upang ihatid ang libreng mahahalagang serbisyo at alagang pangkalusugan sa mga residente sa iba’t ibang barangay sa lungsod.
Nabenepisyuhan sa caravan ang karagdagang 600 na residente ng Barangay Talon Dos na ginanap sa Bambusetum Covered Court.
Nakatanggap sila ng libreng mga serbisyo mula sa lokal na pamahalaan na patunay ng dedikasyon nitong tiyakin na madaling makukuha ng mamamayan ang iba’t ibang healthcare services.
Handog ng programa ang free medical consultations, blood sugar and cholesterol screenings, chest X-rays, ECG tests, dental services, at pneumonia vaccinations para sa mga senior citizens.
Kabilang din sa karagdagang suporta na nakuha ng mga residente ang libreng gamot, PhilHealth registration, Green Card program assistance, at mobile birth registration.
Personal namang tinutukan ni Vice Mayor April Aguilar kasama sina konsehal Mark Anthony Santos at Henry Medina ang health and wellness caravan sa lugar sa pangangasiwa ni City Health Office head Dr. Juliana Gonzalez upang siguruhin ang maayos na pamamahagi ng mga serbisyong kailangan ng mga residente.
Binigyang-diin ni Dr. Gonzalez ang importansiya ng preventive care at community outreach programs na mahalagang hakbang sa pagsiguro sa kalusugan at kapakanan ng mga Las Piñeros.
Ang nasabing caravan ay karagdagang mahalagang pagtugon ng Las Piñas LGU na magbigay ng komprehensibong mga serbisyong pangkalusugan. (Bhelle Gamboa)
