8 foreign nationals hinuli sa financial scam sa Parañaque City

Walong Chinese nationals ang hinuli ng mga ahente ng National Bureau of Investigation-National Capital Region sa ilalim ng superbisyon ni NBI Director Judge Jaime B. Santiago (Ret.) dahil sa online phishing operations sa Parañaque City.

Ang naturang kaso ay nag-ugat sa intelligence report na may grupo ng foreign nationals ang nagsasagawa ng investment fraud, crypto asset/currency scam, romance scam, at identity theft gamit ang social engineering scheme at digital communication schemes.

Ang NBI agents kasama ang impormante ay nagkasa ng surveillance sa lugar kung saan natukoy at nakumpirma ang mga ilegal na aktibidad.

Nitong January 14, 2025 nag-isyu ang Parañaque City Regional Trial Court ng Warrant to Search, Seize, and Examine Computer Data (WSSECD) laban kay Hwang Xiaobin at iba pa.

Ipinatupad naman ang WSSECD ng NCR operatives kasama ang kinatawan mula sa Digital Forensic Laboratory (DFL), dito natagpuan ang laptop an desktop kung saan may transcript template ng Phishing o social engineering schemers na ginagamit sa pagkuha ng sensitibong impormasyon ng ibang tao, at mga transaksyon sa pera ng crypto currency scams sa ginawang onsite examination.

Paglabag sa kasong RA 10175 Computer Related Forgery under Sec. 4(b)(1) of the Cybercrime Prevention Act and RA 12010, o mas kilala sa tawag na “The Anti Financial Account Scamming Act (AFASA)” ang isinampa laban kina Hwang Xiaobin (at large); Xiao Li; Channel Zi Gao; Ming Ru Li; Wen Shu Liu; Qui Shun Li; Cai Li Pan; Changfu Liu; at Zhang Zhen Hong sa Parañaque City Prosecutors’ Office.

Pinuri naman ni Director Santiago ang NCR sa matagumpay na operasyon at tiniyak sa publiko na ang NBI ay patuloy sa maigting nitong kampanya kontra illegal scamming operations. (Bhelle Gamboa)