Tax amnesty, insentibo ng mga empleyado kabilang sa tinalakay ng Las Piñas Sanggunian

Masinsinang tinalakay ng Sangguniang Panlungsod ng Las Piñas sa pamumuno ni Vice Mayor April Aguilar ang mahahagalang usapin sa pagbibigay ng amnestiya sa buwis, mga benepisyo ng empleyado, kapakanan ng mga bata at preserbasyon ng kultura, sa ginanap na ika-112 na regular session sa city hall.

Kabilang sa pinag-usapan ang endorso sa Implementing Rules and Regulations (IRR) ng Republic Act No. 12001 na nagbibigay ng tax amnesty sa real property taxes at special levies naman para sa delingkwentengproperty owners na may mga pagpipilian para sa one-time payment o installment hanggang July 5, 2026.

Pinag-aralan din ng Sanggunian ang kahilingan ng City Treasurer para sa paglalabas ng Service Recognition Incentive (SRI) sa lahat ng kuwalipikadong empleyado ng lokal na pamahalaan alinsunod sa Administrative Order No. 27 na inisyu noong December 12, 2024.

Kasama rin sa tinalakay ang mga panukalang pag-amyenda sa Children’s Code ng Las Piñas na layuning i-update ang depinisyon katulad ng “Fully-Immunized Child,” pagpapalawak ng ng mga karapatan ng bata sa immunization, at pagpapaganda ng maternal at child health services na kinakailangan pa ng deliberasyon.

Sa karagdagan, pinag-usapan din ng konseho ang panukalang resolusyon na kumikilala sa bagong opisyal na listahan ng tinukoy na heritage at cultural sites sa lungsod kung saan ang listahang ito ay iendorso sa National Commission for Culture and the Arts (NCAA) upang lalong ipakilala at protektahan ang mayayamang kultura ng Las Piñas.

Ang sesyon ay patunay sa pangako ng konseho para sa reporma ng fiscal, kapakanan ng mga empleyado at bata gayundin sa pagpreserba sa kultura na ikabubuti ng mga residente sa lungsod. (Bhelle Gamboa)