Babaeng nagbenta ng sanggol sa QC, arestado ng mga otoridad
Arestado sa ikinasang entrapment operation ang isang babae matapos magbenta ng 11-araw na gulang na lalaking sanggol sa Quezon City.
Sa pamumuno ni PBGEN Portia B. Manalad, naging matagumpay ang koordinasyon ng PNP Women and Children Protection Center (WCPC), Luzon Field Unit – WCPC, Quezon City Police District, National Capital Region Police Office, at City Social Welfare and Development Office sa kanilang operasyon.
Ang naarestong babae ay miyembro ng isang Facebook group na nagsisilbing bentahan ng mga bata.
Agad dinala ang akusado sa Department of Justice (DOJ) upang sumailalim sa inquest proceeding.
Ayon sa akusado, ipinabenta lamang sa kanya ang sanggol na anak umano ng kanyang kaklase.
Matapos ang inquest proceeding, nananatili ang akusado sa kustodiya ng PNP-WCPC at kasalukuyan namang nasa pangangalaga ng Department of Social Welfare and Development – DSWD ang sanggol na nasagip upang mabigyan ng karampatang aruga at kalinga. (DDC)
