LTO naglabas ng show cause order sa driver at may-ari ng modern jeep na nasangkot sa aksidente sa Bulacan

Nagpalabas ang Land Transportation Office (LTO) ng Show Cause Order (SCO) laba sa driver at registered owner ng modern jeepney na nasangkot sa malagim na aksidente sa Calumpit, Bulacan noong Jan. 14.

Dalawang katao ang nasawi at 18 ang nasugatan dahil sa nasabing aksidente.

Ayon kay LTO Chief, Assistant Secretary Atty. Vigor D. Mendoza II, magsasagawa ng imbestigasyon hinggil sa nasabing aksidente na ikinasawi ng isang tricycle driver at pasahero nito na nabangga ng modern jeep.

Nagpaabot naman ng pakikiramay si Mendoza sa pamilya ng mga nasawi.

“First, we would like to extend our deepest condolences to the family of the two people who lost their lives as a result of this unfortunate incident. We assure them that we in the LTO do everything within our power to bring justice,” ayon kay Mendoza.

Sa gagawing imbestigasyon, sinabi ni Mendoza na tutukuyin kung nagkaroon ng kapabayaan ang driver at aalamin kung napapanatili bang road worthy ang sasakyan.

Sa inisyal na imbestigasyon, binabaybay ng modern jeepney ang kahabaan Mac Arthur Highway sa Brgy. Iba O Este sa Calumpit nang mawalan umano ng preno ang modern jeep na may plakang NIF 2746.

Ang modern jeep na minamaneho ni Orlando M. Dungan Jr. ay pag-aari ng Carmess Jeepney Transport Service Cooperative.

Tumawid sa kabilang bahagi ng kalsada ang modern jeep dahilan para tamaan nito ang tricycle.

Sa SCO na inilabas ng LTO, inatasan ang driver at ang registered owner ng modern jeep na sumipot at magpaliwanag sa LTO Region 3 office. (DDC)