National Prayer for Peace Rally ng INC suportado ng Malakanyang

Suportado ng Palasyo ng Malakanyang ang National Prayer for Peace Rally na ikinasa ng Iglesia ni Cristo sa Quirino Grandstand, Manila at sa iba’t ibang bahagi ng bansa.

Ayon kay Executive Secretary Lucas Bersamin, ginagarantiya ng Konstitusyon ang mapayapang pagtitipon.

Utos ng Malakanyang sa lahat ng ahensya ng gobyerno, huwag hadlangan ang karapatan ng INC.

Sinabi pa ni Bersamin na handa ang mga kaukulang ahensiya ng gobyerno na ipagkaloob ang kailangang serbisyo para panatilihin ang mapayapa at maayos na national rally.

Kabilang na rin aniya rito ang emergency health services, gayundin ang pangangasiwa sa transportasyon at trapiko.

“Walang duda ang aming paniniwala na magiging mapayapa, matiwasay at makabuluhan ang mga pagtitipon sa araw na ito,” pahayag ni Bersamin.

“Higit sa lahat, umaasa kami na ang mga ipapahayag na mga opinyon ay makakatulong sa paglilinaw sa mga usaping kinakaharap ng ating bansa at maghahatid sa atin sa tunay na pagkakaisa na ating Inatasam,” dagdag ni Bersamin.

Umaasa si Bersamin na ang rally ay magsisilbing platform para maihayag ang opinion at matulungan ang bansa sa pagkamit sa pagkakaisa at progreso.

“We view today’s assemblies as part of the national conversation we should be having as a people to bring clarity and consensus on issues that face us all and affect our future,” pahayag ni Bersamin.

Sinuspinde ng Malakanyang ang trabaho sa gobyerno at pasok sa eskwela sa Manila at Pasay City para bigyan daan ang rally.

Ikinasa ng INC ang rally para tutulan ang impeachment o pagpapatanggal sa puwesto kay Vice President Sara Duterte. (DDC)