3 boy scouts nasawi matapos makuryente habang nasa camping sa Zamboanga City

Nasawi ang tatlong boy scouts habang sugatan ang 12 iba pa matapos makuryente habang sila ay nasa camping para sa 2024 Council Scout Jamboree sa Climaco Freedom Park, Pasonanca, Zamboanga City.

Ayon sa ulat ng City Disaster Risk Reduction and Management Office (CDRRMO), inililipat ng mga scouts ang kanilang tent nang mabangga ang live wire.

Ang mga nasawing scouts ay sina Sct. Geofree Atilano, Sct. Alvien Gaspar at Sct. Emman Iguid.

Ang 12 sugatan ay pawang nagtamo ng electrical burns sa kanilang katawan, subalit nasa ligtas naman na silang kalagayan.

Dahil sa insidente, kinansela na ng lokal na pamahalaan ang apat na araw na aktibidad. (DDC)