Pasahero sa NAIA nahulihan ng mga bala

Arestado ang isang 60-anyos na lalaki matapos mahulihan ng mga bala ng baril sa Terminal 2 ng Ninoy Aquino International Airport (NAIA).

Ayon sa PNP Aviation Security Group, paalis ng NAIA ang pasahero at patungo sana sa Cagayan de Oro.

Ang suspek na residente ng Pandi, Bulacan ay nahulihan ng mga tauhan ng Office for Transportation Security (OTS) ng 11-piraso ng bala ng Caliber .22 sa kaniyang bagahe.

Nabigo ang pasahero na magpakita ng legal documents para sa mga dala niyang bala.

Hawak na siya ng mga tauhan ng AVSEGROUP at mahaharap sa kasong paglabag sa Republic Act 10591 o “Comprehensive Firearms and Ammunition Regulation Act. (DDC)