Jonvic Remulla nanumpa na sa pwesto bilang bagong DILG secretary

Nanumpa na sa harap ni Pangulong Ferdinand “Bongbong” Marcos Jr. si Cavite Governor Jonvic Remulla bilang bagong kalihim ng Department of the Interior and Local Government (DILG).

Ginawa ang oathtaking sa Palasyo ng Malakanyang.

Sa inilabas na pahayag, sinabi ni Remulla na tinanggap niya ang hamon ni Pangulong Marcos na pangasiwaan ang DILG para makatulong hindi lamang sa kaniyang lalawigan kundi sa buong Pilipinas.

Ayon kay Remulla sa simula pa lamang ay adhikain na niya na palakasin ang kakayahan ng lokal na pamahalaan at ng pambansang pulisya para maging pantay ang karapatan ng lahat tungo sa mas mabuting kinabukasan.

Ayon kay Remulla, matapos ang 29 na taon na nagsisilbi sa lokal na pamahalaan ng Cavite, iiwan niya itong maayos ang kalagayan.

Sa katunayan, sinabi ni Remulla na kinikilala ang Cavite bilang pinaka-business friendly province sa bansa.

Nagpasalamat din si Remulla sa kaniyang mga kababayan sa pagsuporta sa kaniyang buong panahong pagseserbisyo sa lalawigan.

Pahabol pa ni Remulla ang dating nakagawian niyang pag-anunsyo ng hashtag na walang pasok season ay hindi na lamang ngayon sa Cavite kundi sa buong Pilipinas na. (CY)