Jonvic Remulla bilang bagong DILG secretary, kumpirmado na

Kinumpirma ng Palasyo ng Malakanyang na si Cavite Gov. Juan Victor “Jonvic” Remulla ang itatalaga bilang bagong kalihim ng Department of the Interior and Local Government (DILG).

Umugong ang bali-balita hinggil sa pagkakapili kay Remulla para pamunuan ang ahensya makaraang bawiin niya ang inihaing certificate of candidacy bilang reelectionist governor sa lalawigan.

Kasabay ng pagkumpirma ng Presidential Communications Office (PCO), nagbahagi din si Remulla ng pahayag sa kaniyang official Facebook page.

Ani Remulla, buong puso niyang tinanggap ang hamon bilang DILG secretary upang makatulong hindi lamang sa lalawigan ng Cavite kundi sa buong Pilipinas.

Sinabi ni Remulla na 29 na taon siyang nanilbihan sa local government at 11 taon doon ay bilang gobernador ng Cavite.

Hiniling ni Remulla ang dasal at suporta ng publiko upang siya ay maging matagumpay sa bagong tungkulin.

Nabakante ang pwesto bilang DILG secretary matapos magsumite ng COC si Benhur Abalos para tumakbo bilang senador. (DDC)