5 kabilang ang 4 na bata patay sa sunog sa Tondo, Maynila

Lima ang nasawi sa sunog na sumiklab sa Gate 20, Parola Compound, Tondo, Maynila.

Ayon sa Bureau of Fire Protection, nagsimula ang sunog sa ikalawang palapag ng bahay na pag-aari ng pamilya Loyola pasado alas 11:00 ng gabi ng Sabado (feb. 21).

Mabilis na kumalat ang apoy at nadamay ang iba pang mga bahay sa lugar. Umabot sa 4th alarm ang sunog bago tuluyangng naapula alas 6:11 na ng umaga ng Linggo (Feb. 21).

Kinilala ng Bureau of Fire Protection (BFP) ang mga nasawi na sina Jake Loyola, 37 anyos; Noah Loyola, 3 taong gulang; Richard Tigas, 10 taong gulang; Kiefer Loyola, 8 taong gulang; at Jeric Tigas, 12 anyos.

Limang residente naman ang nagtamo ng sugat.

Tinatayang 300 bahay ang nadamay sa sunog at 600 pamilya ang nawalan ng tirahan.

Ayon sa BFP aabot sa P300 milyon ang halaga ng pinsala ng sunog.

Bahagya pang nagkaroon ng tensyon dahil ayon sa BFP may mga residenteng umaagaw sa hose ng mga bumbero.

Ang ilang fire volunteers ay napilitang umalis sa lugar dahil sa panggugulo at pananakit ng mga residente.