Las Piñas Gold medalist figure skater bumisita kina Mayor Mel at VM April Aguilar
Malugod na tinanggap nina Las Piñas City Mayor Imelda Aguilar at Vice Mayor April Aguilar si Julian Jean Quijano Plata, isang kabataang figure skater mula sa Las Piñas City National Science High School, sa isinagawa nitong courtesy visit sa city hall.
Ang estudyanteng si Plata ay nagbigay ng karangalan sa Las Piñas sa pamamagitan ng kanyang panalo ng maraming gold at silver medal awards sa Skate Asia 2024 competition na ginanap sa Taipei, Taiwan, magmula August 3-11, 2024.
Nagpamalas ng kahanga-hangang performance si Plata sa mga kategoryang Freestyle 4, Artistic FS4, at Solo Compulsories na nagkamit ng pagkilala para sa kanyang eskwelahan at lungsod.
Sa kanyang pagbisita, masayang binati nina Mayor Mel at Vice Mayor April ang skater na si Plata dahil sa mga nakamit nitong tagumpay at isang positibong kinatawan ng Las Piñas sa nabanggit na internasyunal na kompetisyon.
Nagpasalamat naman ang nasabing kabataang atleta sa suporta ng kanyang pamilya na malaking tulong sa kanyang tagumpay.
Kinikilala ng administrasyong Aguilar ang kasipagan at determinasyon ng skater na si Plata kung saan ang kanyang tagumpay ay magsisilbing inspirasyon sa kapwa nito kabataan sa Las Piñas.
Inihayag ng alkalde at bise-alkalde ang patuloy nilang suporta sa mga kabataang atletang Las Piñeros na nagpapamalas ng pambihirang talento at dedikasyon sa kani-kanilang sports. (Bhelle Gamboa)
