Sen. Nancy Binay naghain ng COC para sa pagka-alkalde sa Makati City
Naghain si Senador Nancy Binay ng kanyang certificate of candidacy (COC) sa pagka-alkalde ng Makati City, sa tanggapan ng Commission on Elections (Comelec) sa Barangay Valenzuela Community Complex sa lungsod pasado alas-10:00 ng umaga.
Kasama ni Sen. Binay ang kanyang running mate na si Monsour del Rosario na naghain din ng kanyang COC para sa pagkabise-alkalde ng Makati.
Sina Binay at del Rosario ay parehong kandidato sa ilalim ng partidong United Nationalist Alliance (UNA).
Magiging katunggali ni Nancy Binay sa pagka-alkalde ang asawa ni Mayor Abby Binay na si Luis Campos habang magiging bise-alkalde nito ang kasalukuyang Congressman na si Kid Peña.
Nagpakita naman ng kanyang suporta si dating Mayor Jun Jun Binay para sa kapatid nitong si Sen. Nancy matapos nitong dumating sa kasagsagan ng paghahain ng COC.
Maaga ring nagtipon-tipon ang mga tagasuporta ng senadora at ni Del Rosario sa lugar upang ipakita ang kanilang suporta sa kandidatura ng kanilang pambato.
Ayon kay Jun Jun nag uusap-usap na sila kasama ang kanilang amang si dating Vice President Jejomar Binay na suportahan ang bawat isa sa kanilang tatakbuhing posisyon.
Samantala inihayag ni Sen. Nancy ang kanyang track records sa Senado na malaking bentaha para sa kanyang kandidatura at ang nakukuhang suporta mula sa pamilyang Binay at mga supporters. (Bhelle Gamboa)
