Lalaki patay matapos mabagsakan ng kable ng kuryente sa Cagayan

Patay ang isang lalaki nang mabagsakan ng kable ng kuryente sa bayan ng Sta. Ana sa lalawigan ng Cagayan.

Nakilala ang biktima na si Benjoe Castrence, 25-anyos na residente ng Barangay Tangatan sa nasabing bayan.

Ayon sa Sta. Ana Police, pauwi galing trabaho ang biktima sakay ng kanyang motorsiklo nang bigla na lamang bumagsak ang kable ng kuryente.

Tumama sa biktima ang kable dahilan para siya ay sumemplang.

Dinala pa sa Fr. Gerry Felipe Memorial Hospital ang biktima subalit idineklarang dead on arrival.

Base sa pagsusuri sa ospital, pagka-kuryente ang sanhi ng pagkamatay ng biktima. (DDC)