Rep. Erwin Tulfo suportado ang SOGIESC Equality Bill; proteksyon sa karapatan ng LGBTQIA+ Community isusulong

Tiniyak ni House Deputy Majority Leader, ACT-CIS partylist Rep. Erwin Tulfo, na suportado niya ang Sexual Orientation and Gender Identity and Expression and Sex Characteristics (SOGIESC) Equality bill sa Kongreso upang protektahan ang mga karapatan ng LGBTQIA+ community sa bansa.

Sa kanyang interpelasyon nitong Miyerkules sa panukalang batas na pinangunahan ng author nito na si Bataan Rep. Geraldine Roman, ipinahayag ni Tulfo ang kanyang kasiyahan sa nasabing panukala.

Sinabi rin ni Roman na dapat tularan ng media ang magkapatid na Tulfo para sa pagsuporta sa SOGIESC Equality Bill.

Nais tiyakin ni Tulfo na ang panukalang batas na nagbabawal ng diskriminasyon ay tunay na makakatulong sa ekonomiya at makakahikayat din ng dayuhang pamumuhunan sa bansa.

Bilang isang media practitioner, iminungkahi rin ni Tulfo ang isang epektibong kampanya ng pagpapalaganap ng impormasyon upang ipaalam sa publiko ang tungkol sa nasabing anti-discrimination bill.