Balitang nagbitiw si Defense Sec. Teodoro, tinawanan lang ni PBBM

Natawa na lang si Pangulong Ferdinand Marcos Jr. sa tsismis na nagbitiw si Defense Sec. Gilberto Teodoro Jr.

Sa ambush interview sa Navotas, ilang beses na binigyang-diin ng Pangulo na fake news ang naturang ulat.

Tinawag ni Pangulong Marcos na imbento, paninira at desperado ang ganitong mga istorya na panggulo lamang at hindi naman nakatutulong sa buhay ng mga Pilipino.

Muling pinayuhan ng pangulo ang publiko na maging maingat, mapanuri at huwag agad maniwala sa mga ulat na walang pruweba.

Ayon kay PBBM, abala sila ng mga opisyal sa pagtatrabaho para makatulong sa mga kababayan at kung paanong pagandahin ang Pilipinas.

Kung may mangyari man anyang pagbabago sa gabinete, ang Malakanyang o ang pamahalaan mismo ang mag-aanunsyo at hindi kung sino-sino na basta lamang nagpo-post sa social media. (DDC)