Yate kabilang sa sinakyan ni Alice Guo sa paglabas ng bansa

Kinumpirma ni dismissed Bamban, Tarlac Mayor Alice Guo na sumakay sila ng mga bangka sa pag-alis nila sa bansa.

Sa pagtatanong ni Senator Risa Hontiveros ay sinabi ni Guo na kabilang sa sinakyan nila ay isang yate galing sa pantalan sa Metro Manila.

Pero tumanggi si Guo na isapubliko ang pangalan ng mga taong tumulong sa kanila para makasakay ng yate gayundin ang kung sino ang may-ari nito.

Sa halip, paulit-ulit na sinabi ni Guo na nangangamba siya para sa kaniyang kaligtasan dahil sa death threats na kaniyang tinatanggap.

Magugunitang sa pagharap sa senado ay inamin din ng kapatid ni Alice na si Shiela na nagpalipat-lipat sila ng bangka nang sila ay tumakas patungong Malaysia. (DDC)