3 Chinese nationals dawit sa pagnanakaw at pananakit sa kababayan sa Pasay City arestado

Inaresto ng otoridad ang tatlong Chinese national na sangkot sa umano’y pagnanakaw at pananakit sa isa nilang kababayan, sa ikinasang operasyon sa isang residential building sa Barangay 5, Pasay City.

Kinilala ang mga arestadong suspek na sina alyas Shipeng, 32-anyos; alyas You Liang, 36-anyos; at alyas Hai Tao, 29-anyos, pawang mga lalaking Chinese national na pansamantalang naninirahan sa Metro Manila.

Ang lalaking biktima ay kinilalang si alyas Chenghuan, 25-anyos, isa rin Chinese national.

Ayon sa inisyal na imbestigasyon, sinaktan umano ng mga suspek ang biktima at sapilitang kinuha ang kanyang pera na nagkakahalaga ng ₱310,000 sa pamamagitan ng online transactions gamit ang Alipay, WeChat Pay, at USTD.

Nakahingi ng tulong ang biktima sa mga security personnel na agad nakipag-ugnayan sa mga tauhan ng Sub-station 1 ng Pasay City Police Station na nagresulta sa pagkaaresto ng mga suspek at narekober ang patalim at mga cellphone.

Nakakulong ang tatlong suspek sa Pasay CPS at inihahanda na ang pagsasampa ng kaukulang kaso laban sa mga salarin. (Bhelle Gamboa)