LPG Tank sumabog sa nakadaong na barko sa North Harbor sa Maynila, 1 ang patay

Isa ang patay habang dalawa ang sugatan sa insidente ng pagsabog na nangyari sa MV Everwin Star 2 sa Pier 18, North Harbor sa Tondo Maynila Lunes, ika-26 ng Agosto.

Ayon sa Philippine Ports Authority (PPA), dakong alas-10:50 ng umaga nang makarinig ng pagsabog sa lugar.

Agad namang rumesponde ang mga otoridad.

Ayon sa kapitan ng MV Everwin Star 2 na si Olympio Aldovino, isang apprentice ang nasawi habang dalawa namang personnel ang sugatan matapos magtamo ng third degree burns.

Dinala ang mga nasugatang biktima sa Jose Reyes Hospital.

Ayon kay FO2 Ronnie S. Augustin, Arson Investigator of BFP Manila Fire District, nag-ugat ang pagsabog mula sa fumes na posible umanong galing sa gasolina at pintura.
Gayunman, tinitingnan din ng mga otoridad kung nagmula rin ang apoy sa LPG.

Posible umano na nagsimula ang pagsiklab ng apoy mula sa hydraulic switch.

Iniimbestigahan pa rin ng mga otoridad mula sa Port Police ng Philippine Port Authority, Philippine National Police, Philippine Coast Guard, at Bureau of Fire Protection ang nasabing insidente. (DDC)