P680K shabu at baril narekober sa anti-crime ops sa Muntinlupa City

Bumagsak sa kamay ng mga operatiba ng Muntinlupa City Police Substation 3 Alabang ang isang lalaking suspek matapos makumpiska ang baril at hinihinalang shabu na nagkakahalaga ng ₱680,000 sa isinagawang anti-crime operation sa Purok 8, Bautista St., Brgy. Alabang sa lungsod.

Ang inarestong suspek ay kinilalang si alyas Puti, 31-anyos.

Batay sa report na natanggap ng Southern Police District, agad rumesponde ang otoridad sa sumbong ng nagmamalasakit na residente na may isang lalaki na may bitbit ng baril sa lugar.

Nakumpiska sa suspek ang isang .38 caliber revolver na walang serial number, tatlong bala ng baril at tinatayang 100 gramo ng umano’y shabu na nakasilid sa sling bag nito.

Nakakulong ang suspek sa Muntinlupa City Custodial Facility at nakatakdang sampahan ng kasong paglabag sa R.A. 9165 (Comprehensive Dangerous Drugs Act) at R.A. 10591 (Comprehensive Firearms and Ammunition Regulation Act). (Bhelle Gamboa)