Lalaki kalaboso sa granada at gun replica sa Las Piñas City
Hindi na nagawang pumalag pa ng isang lalaki nang dakpin siya ng mga operatiba ng Las Piñas City Police Station Intelligence Section (SIS) makaraang mahulihan ng granada at gun replica sa gitna ng isinasagawang casing and surveillance operation sa Barangay Pulanglupa Uno sa lungsod.
Kinilala ang naarestong suspek na si alyas Rigor, 33-anyos.
Ayon sa report na natanggap ng Southern Police District (SPD), nagsasagawa ng surveillance ang mga operatiba sa lugar nang maaktuhan ang suspek na mayroong hawak na baril.
Dahil dito mabilis na sinuri ng mga pulis ang dalang sling bag ng suspek kung saan nadiskubre ang isang granada.
Ang suspek ay nasa kustodiya ng Station Investigation and Detective Management Section (SIDMS) para sa dokumentasyon at pagsasampa ng kaukulang kaso laban dito. (Bhelle Gamboa)
