2 BuCor officials tumanggap ng komendasyon

Ginawaran ng Bureau of Corrections (BuCor) ng mga komendasyon ang kanyang dalawang opisyal dahil sa kanilang kapansin-pansing accomplishments at napakahusay na ambag sa Bureau.

Sina CT/CSupt Ma.Cecilia V. Villanueva, MD, Director, Directorate for Health and Welfare Services at C/CInsp Eduardo P. Gogorza, Acting Director, Directorate for Security and Operations ay kapwa ginawaran ng letters of commendation na pirmado ni BuCor Director General Gregorio Pio P. Catapang Jr. para sa natatanging liderato at top-notch public service ng naturang dalawang opisyal.

Ang mga kontribusyon ni CT/CSupt Villanueva ay mahalaga sa itinataguyod na mga inisyatiba sa kalusugan sa mga correctional facilities upang siguruhing matatanggap ng Persons Deprived of Liberty (PDLs) ang wastong suporta at pangangalagang medikal.

Habang ang liderato naman ni C/CInsp Gogorza sa kabuuang security operations ng BuCor ay lalong nagpaayos sa safety protocols kaya mas ligtas ang kapaligiran para sa mga tauhan at PDLs.

Ang mga komendasyon ay nagsilbing pagkilala sa kanilang tagumpay at inspirasyon para sa BuCor personnel na lalong magpursige sa kani-kanilang tungkulin.

Patuloy ang BuCor sa pagbibigay-diin sa importansiya ng malakas na liderato at dedikadong serbisyo sa kanyang mandato na reporma at rehabilitasyon sa ilalim ng pangangalaga nito. (Bhelle Gamboa)