Atin ang West Philippine Sea – Pang. Marcos
Sa kaniyang State of the Nation Address (SONA) sinabi ni Pangulong Ferdinand Marcos Jr. na igigiit ng Pilipinas ang karapatan at interest nito sa West Philippine Sea.
Ayon sa pangulo, ito ay kahit pa ang kapalit nito ay ang mga hamon na kakaharapin ng bansa sa sa usapin ng territorial sovereignty.
Sinabi ng pangulo na hindi isang kathang-isip lamang ang West Philippine Sea at ito ay pag-aari lamang ng Pilipinas.
“Ang West Philippine Sea ay hindi kathang-isip natin lamang. Ito ay atin. At ito ay mananatiling atin, hangga’t nag-aalab ang diwa ng ating minamahal na bansang Pilipinas,” ayon sa pangulo.
Umani ng mahabang palakpak at hiyawan ang pahayag na ito ng pangulo.
Kaugnay nito ay nagpasalamat ang pangulo at kinilala nito ang sakripisyo ng buong Sandatahang Lakas, Philippine Coast Guard, at maging ng mga mangingisda sa West Philippine Sea. (DDC)
