Lalaki patay matapos saksakin ng ex ng kaniyang live in-partner sa Pasay City

Patay ang isang lalaki nang tadtarin ng saksak ng dating kinakasama ng kanyang live-in partner sa Pasay City.

Dead on the spot ang biktimang si alyas Mohamad, nasa hustong gulang, nakatira sa Quiapo, Manila.

Tinutugis pa ang suspek na si alyas Saidali, residente rin ng Quiapo, Manila.

Sa inisyal na ulat n Pasay City Police, dakong alas 4:00 ng hapon ng Hulyo 16, 2024, nangyari ang pananaksak sa New Road, Macapagal Boulevard, Barangay 76 Pasay City, sa likod ng Dampa Paluto.

Nabatid na ang live-in partner ng biktima na si alyas Vilma, 17-anyos, ang nagsabi sa otoridad ng mga pangalan ng biktima at suspek.

Magkatabing natutulog sa Bajah tricycle ang sina alyas Mohamad at alyas Vilma nang biglang sumulpot ang suspek bago pinagsasaksak umano ng ilang ulit sa katawan ang biktima na sanhi ng agaran niyong pagkamatay.

Mabilis na tumakas ang suspek sakay ng motorsiklo matapos ang insidente.

Si alyas Vilma na rin ang nagbigay ng impormasyon na dati niyang live-in partner ang suspek.

Kinunan din ng salaysay ang isa pang babaeng witness na nakatira sa Seaside Dampa hinggil sa nangyaring krimen.

Posiblebg maharap sa kasong murder ang suspek. (Bhelle Gamboa)